البارحة ربي كتب لي ومريت

محمد ابن فطيس المرّي

البارحة


البارحة ربي كتب لي ومريت

دربٍ عليه بروق الأحباب لاحت

جيت المكان اللي جمعنا وخفيت

وقامت جروحي للجوارح وصاحت

ياليتني في لفة الدرب زليت

كان العيون من الدموع استباحت

إلتم غيم الدمع من يوم لفيت

وورقا القصيد لشوفة الغيم ناحت

وضحكت ماأبغي الناس تدري يبالفيت

لكنها غصبٍ على العين ساحت

حارت دموعي في عيوني وصديت

وأرمشت مابيها تبين وطاحت

وعقبه برق في العين براق واسقيت

خدي ووناتي بصدري تلاحت

وأنا أحسب إني في فراقه تشافيت

وإن عبرتي من مدخل الزاد زاحت

اللي يحسب إني على البعد سجيت

وإلا إن عيوني للرقاد استباحت

ياليتني من قبل لا أحبه أقفيت

وإلا إن دروبي عن دروبه تناحت

أهون علي من البكا والتناهيت

وأشلا من سدودٍ على الناس باحت

عرفت كيف الحي يفرق عن الميت

وعرفت قيمة نعمتي يوم راحت

قولوله إني عقب بعده تدانيت

ورجلي عن دروب المعافين شاحت

البعد نار وطاعة العذل كبريت

يقصر على بعده ترى الكبد فاحت