شروط العلياء ..

شروط العيا يا باغيها...

هذه نصائح ذهبيه ووصايا طيبه اقدمها لي ولكم اخواني واخواتي الاعزاء في هذا المنتدى الطيب بكم منتدى آل تليد ..
اتمنى ان انتفع واياكم بهذه النصائح ..
ولكم جمعاً تقديري وخالص مودتي ..

واترككم الآن مع قصيدة النصائح الطيبه


‏​‏​​‏​ياباغي العليا لهـا عشرة ابنود
سجل وانا بمليك واحفظ عددها

من شان مايلحقك عيـبِ ومنقود
احفظ وصاتي والوصاة اعتمدها

اوصيك قبل الجسم يدبيبـه الدود
في حفرةِ لابد نسكن لحدها

دنيا العنا فيهـا مشاريب وعـدود
وكم واحدِ له حاجةِ ما وجدها

عليك بالتقوى ترى العمـر محدود
واردع هوى النفس الدنيـّه وقدها

واحفظ صلاتك تكسب الرزق والفود
تكسب مكاسيب الحياه وسعدها

وصوم رمضان وزك يالشامخ الطود
ترى البيوت النايفه من عمدها

وجالس هل التوحيد والعز والجود
واترك مقاريد العباد وقردها

اللي على التفريق ياتونـك احشود
فصيلةِ دب الجهل في جسدها

واحسن جوار الجار لو كان مقرود
لو جار نفسك لاتبيـّن نكدها

والضيف عطه الطيب والطيب مردود
اكسـب جناب الطيبين وسندها

عقب الشحم والبـن قدم له العود
حيثك من اللي من لفاها حمدها

وبنت الردي لو هي زلالِ وقرهود
حذراك تقربها وتمسك بيدها

خذ بنت قرمن عند الاجواد محمود
لا جا نهار الهوش بيـن ولدها

وزلة رفيقك لالفت دون مقصود
لا تمسك الزله وهو ماقصدها

ثـلاث مررها ولا شك بشهود
والرابعه شب الحطب لا وردها

هذي عشر وان كـان تبغيني ازود
سجّل على عشر الوصايا وزدها

الظلم شين وتالـي الظلم مـردود
والغيظ شيطان القلوب وكبدها

والصّمت زين والحكي سيف محدود
والحقد غيمه والتباغظ بردها

فكر وميـّز واعرف البيض والسود
واحذر قلوب الحاسدين و حسدها

ياخوك بين الناس طارد و مطرود
ما تجهلك بعض الحرار و هددها

وان ضامتك دنياك واصبحت مضهود
فاطلب من المولى يحلل اعقدها

الواحد اللي كلبونا لـه اسجود
اللي جميع اعمال خلقه رصدها

هذي نصيحه وانت معطيني اوعود
واهل الوفى والعرف توفي وعدها

قدمتها بالمسك والطيب والعود
زرعتها لك زرع و انت اتحصدها

حميتها مـن دون ملحن وبارود
خوفِ عليها المنتقد ينتقدها

وختامها العليا لها اشروط وبنود
ياللي تبا العليا تمعن وعدها‏​‏​​‏

وفي الختام لكم جميعاً محبتي وتقديري...


لحريصي..