من قصائد الشيخ عبدالله بن سعد بن هادي (الوصية)

من قصائد الشيخ عبدالله بن سعد بن هادي رحمه الله بعنوان (الوصية)


يوصي بها ابنه . سعيد بن عبدالله بن سعد بن هادي .




أول كلامي طلبة الله بديه


يا عدل يارواف عالم بحالي


أرجيه يغفر زلتي والخطيه


لى رحت في قبري وقد ني لحالي


ما عاد لي من هو يرد الوصيه


ولا ابن عم لي قريب موالي


قال ابن هادي بادي (ن) في عشيه


في راس مشذوب (ن) عنيش الجبالي


سر ياقلم واكتب بيوت (ن) طريه


واكتب مقالات (ن) على شف بالي


مثل الجنا من غرسة (ن) رازقيه


والا حليب مشملات (ن) غوالي


يا سعيد أنا بوصيك مني وصيه


واحفظ وصاتي ياعريب الخوالي


أوصيك تقوى الله فانها البديه


من يتقي ربه دراجه عوالي


من يتقي ربه دراجه قويه


ويفوز بالجنات يوم الهوالي


والوالدين ألطف بهم بالسويه


من قدم المعروف يبغي التوالي


وأوصيك بأمك زد لها مقدرية


ولا تفضل فوقها أم العيالي


والجار له حق (ن) عليك وعليه


لا زل فاسمح زلته لاتبالي


والضيف قدم له علوم (ن) طريه


شب المناره وادن منها الدلالي


وأكثر له الترحيب واثن التحيه


من عقبها وجدك وهرج عسالي


عند المحاضر خل عندك عنيه


ومن الردى خلك عزيز (ن) وغالي


وترى خوي الجنب له مقدريه


اسمح لزلاته على كل حالي


فان الخوي لابد يذكر خويه


بالطيب ولا بالعلوم الهزالي


وصلاة ربي عد نشو الرفيه


على النبي عدة حقوق المخالي