الرومانسي المنحووس !!

الرومنسي المنحوس

الله يسلمكم كل انسان يحلم باليوم الي يتزوج فيه
جتني الوالده قالت نبي نخطبلك بنت عمك وانت اكبر عيالنا ونبي نشوف احفادنا
قلت في نفسي وجه نكبه واحد يكفي
قلت لها البنت شرايها قالت امها سالتها وماقالت شي
تذكرت المسلسلات المصريه
السكوت علامة الرضا
عشت لحظات حلوه بكمل نص ديني
بعيش الاستقرار الي اسمع عنه ولا شفته
المهم قررو يخطبولي رسمي بعد مانرجع من السفر
اجتمعت العائلتان وقررو يسافرون مع بعض
اخيرا بجتمع مع الحب تحت سقف واحد
سقف السياره طبعا
المهم كشخت بالثوب الابيض والغتره البيضا
وراكب قدام بين عمي وبوي السياره جمس من النوع الكبير
وفي اثناء رحلتنا حصل عطل في السياره
وزين يوم وصلتنا المحطه دخلوها في الورشه
ونزلو يشوفون وش فيها
انا هنا لازم اتدخل وصير منقذ للموقف مابيهم يخافون
قلت بجيب لكم عصير وماء
رحت وجبت لهم مالذ وطاب من انواع العصيرات والكيك والشكولاتات
وانا راجع لهم قاعد اتميلح لزوجة المستقبل عيني انامافارقت زين الاوصاف
خله يشوف صويحبه كيف كشخه
شايل معي مالذ من كل الاصناف
ابيه لاشاف غيري قال كخه

سمعت صراخ لالالالالالا
ياخبل قدامك
انتبه
وانا مدري شسالفه
بالله شترجون من واحد وجه نكبه
حفرة الزيت قدامي ومادريت الا انا وسطها
راحت الكشخه
راحت العصيرات
خربت الرحله
كلي زيت وشحم وريحتي زيت محروق
انكسرت يدي وضلعين من صدري جعلها فدا للي عيونه رمني
كلها كوم وكيف يطلعوني كوم اتزلق من بين يدينهم
وباقي متمسك بكيس العصير
عفستهم عفاس جو بيركبوني السياره قال ابوي والله مايركب
ليه ياابي والله انا فلذة كبدك جنينك😩
قال عمي بشتريله ملابس من المحطه
مايبوني اوصخ سيارتهم
جابلي سروال اخضر مخطط من الجوانب ببيض
وفنيله حمرا اترك لمخيلتكم شكلي

لبسوني وركبوني في المرتبه الاخيره

صار الغضي قدام عيني اشوفه😍
وده يقول لصاحبه الف لاباس

استغربت منها تهز كتوفها من البكي
ودي امد يدي ومسح دموعها وقوللها انا بخير يانظر عيني

جت الطامه الكبرا الحقيره ميته ضحك علي
وصوتها طلع من كثر ماتضحك ابوها قال عيب يابنت وجت عيني في عينه وفطس ضحك
ابوي امي السياره كلها تضحك وانا اصارع الالم والونات
ماقهرني الا العصير يوم مشينا منتثر حول الحفره 💔
الحمد لله تم الزواج بعد فتره بسيطه

وصارت اغلى من عيوني😍

ههههههه بدايه زي كذا مشكله لكن زين اكتمل الامر ع خيرفي نهايتها
اسلوب القصه كان جميل
يسلموو الحره امتعتينا بهذا النقل ولاعدمناك

شكرا تميم اسعدني مرورك
وعسى الضحكة دووم

هههههههههههه والله راح فيها الرومانسي وأهم شي أكتمل الموضوع ع خير
ربي يسعدك الحرة موضوع فكاهي جميل

هههههههههههههههههههه حلوه الاستشهاد بالابيات
رائعه يالحره ربي يسعدك