بيض الله وجهك على كذا رومنسية

قصه ظريفه..
واحدة تحكي قصتها تقول...

أنا متزوجه زوجي مهو رومنسي أبد
خلال سنه زواج اكتشفت إنه مايعرف الهدايا ولا الورد ولاشي..

صح طيب طيب طيب حييييل وعلى نياته ومقدرني ومحترمني..

بقولكم على موقف جلطني
تخيلو أول ذكرى زواج كانت قبل أسبوعين طبعا أعرف إن ماعنده سالفه ولابيجيب شي..
بس قلت أسوي حفله كتغيير جو وأستانس أنا
المهم سويت كل شي قدامه يعني طلبت كيكه وشموع وقلت له..
اليوم ذكرى زواجنا وقلت له جيب مشاوي للعشا قال طيب..

المهم خرج العصريه وجلست أستشور وألبس..
المغرب الجرس يرن قلت أكيد شايل الأغراض
أفتح إلا أمه وخواته وزوجة أخوه😳
دخلتهم وأنا مصدووومه وفيني الصيحه..
قلطتهم طلعت ورجعت مدري إيش أسوي إيشش أقول..!!!

يوم دخلت قالت عمتي أم زوجي ألف مبروك يابنيتي وكلهم صارو يباركون😦
قالت دق فلان وقال يمه اليوم حفلة زواجنا كلمي مرة فلان وتعالو

أنا خلاص من الصدمه مدري أصيح وإلا أضحك وإلا أدق أهزىء فيه وإلا إيش أسوي..!!

طبعا البزارين كل واحد شايل بلونه😫
شوي إلا زوجي المصون جاء وخرجت له وأنا مووولعه وأبي أقطعه تقطيع

لقيته مبتسم وجايب بيده كيس قال جبت ذبيحه بالمناسبه الحلوه هذي😭
آه والله طول السنه أنصدم بتصرفات غريبه مدري براءه وإلا عباطه وإلا إيش ...
بس زي هذا التصرف أبد أبد ماتوقعت😭

أكلنا الكيكه وطبخنا العشا
وجو إثنين إخوانه وكلهم يباركون الظاهر مايدرون إيش القصد من الحفله 😞

وبعد ماراحو جاء الإبتسامه شاقه وجهه يقول إن شاء الله إني بيضت وجهك😭

بلعت وسكت خلاص فات الفوت..

تحممت ولبست وجيت وإلا هو بالسروال والفنيله ونايم وشخيره واصل للجيران😫😫😫

خلاص وقتها عرفت إن مستحيل أقدر أغيره أو أعدل فيه شي..

وجلست يومين مقهوره وآكل في نفسي وبعدين خلاص هديت وفوضت أمري لله😅

عقبال أزواجكم مايبيضو وجيهكم زي كذا

😂😂😂😂😂😂

هذا الرومانسي ولا بلاش

هذا من النوع اللي تنحسد عليه المرأه 😜😂


اللهم لاشماته والله لايبلانا بذا الرومانسي الذوق استغفر الله 🙊😂😂

ههههههه موقفها لا تحسد عليه
والا زوجها والله ماقصر بيض وجهها لكن على طريقته

ياااالهوووي
امه واخواته وكيس ذييحه
اجل وقتها بيحلووووو

جميل التحايا

هههههههههه
مسكينه حزنت عليها بس بصراحه ماقصر بيض الله وجه
كان أتصلت بأهلها وعزمتهم ليش هو يعزم أهله وهيا لا ^_^
يسلمووو جوود
دمتي بخير

ما تنلام المسكينه
لانها عايشه مع كائن داجن


جل التحايا