وجه السنين

ان كنت مخــطي عـــــيب نفسي خطايه =وان كنت صايب صبت يوم اني اخطيت
لكن ما أرضى يطعنون بقفايه = قولوا بوجهي واتركوني الى قفيت
ما جيتهم وانا عليه وصايه =انا على اللي ما درا عني اوصيت
شربت من بحرٍ بليا نهايه =وعلى ضفافه للمحبين ناديت
واسقــيت لــي نــاسٍ ضماهم ضمايه= متى شربت الماء وعنهم تخليت
قاسمتهم زادي وماي وهوايه =ووقفت معهم لين قالوا لي اوفيت
تشهد علي ارضي ويشهد سمايه =يوم الوفا منهم عيونه مخافيت
ان رحت عنهم قدّمتني خطايه= وان جيت معهم عن خطاهم تغاضيت
وقفت في وجه السنين بعصايه =حتى الجمت عني حلوق الشماميت
ما جيت ادور من وراهم جزايه= لو جيت شــافــوني عــليهم تجنيت
ولا جيت لدّنيا بثوب الدعاية =يكفيني اللــي لابــسه عــندما جـــــيت
بديت يوم ان العطا له بداية =وانهيت مشوار العطا يوم ما عطيت
ولو جتني الدنيا عليها عباية =تمشي دلع عن حسنها ما تقصّيت
عرفتها مثلي وراها نهاية =ولو تفتل ذراعي عليها تعاليت
ما شفتها اكثر من وسيلة لغاية =مثل العصا ياللي عليها توكيت
اوجزت واللي قلت فيه الكفاية =ما ابغى الجزا فله ولا ابغى الجزا بيت

للشاعر/ سعود بن حباب