كل عام وأنت بخير وأيامك بخير

كل عام وأنت بخير وأيامك بخيـر

لا يابعـدهـم كلـهـم ياغنـاتـي

إنت بحياتي شي ثاني عن الغيـر

تقدر تقول :أجمل حدث في حياتي

أنت الفرح أنت الوفا والتباشيـر

أنت أمنيه لا والله كـل أمنياتـي

دايم أفكر لو خسرتك وش يصيـر

وقول دايـم جعـل قبلـه وفاتـي

من قبل أعرفك ماحسبت المخاسير

و اليوم شفني ماخسرتك وأحاتـي

إذا افترقنا بطلبك مطلـب صغيـر

لا تزورني بين النعـاس ومباتـي

أخاف لاجوني طيوفـك مساييـر

قلطهـم قلبـي تعشـوا ممـاتـي

ما قلت لك طبع الوجيه المسافيـر

ماتغيب وإن غابت ليالـي وتاتـي

يعني إذا بتغيب من غير تفكييـر

ارجع قبل لا ينكسر لـك ثباتـي

ولا اخذني معك من وين ماتسيـر

مدامك الدرب الطويـل بجهاتـي

لو نفترض إني وصلت السما طير

أحوم حومة حر والريـح عاتـي

المشكلـه إنـي بليـاك ماطـيـر

لأنك جناحـي للمطيـر ونجاتـي

الطيحه منك تترك اسنيـن تأثيـر

من قال لك ماراح تشمت عداتـي

لا والله إلا طيحة الدلو في البيـر

يا كبرهـا منـك الملـم شتـاتـي

وصيتي إن قلبك يذكر الحب بالخير

ولا أنـا والله لأقضـب وصاتـي

أمانتك ..في داخلك شوفني غير

وأمانتي .. لأقربك قـرب ذاتـي

من كثر ماخانت غـلاك التعابيـر

معاك أحس أصدق كلامي سكاتـي

لكن تعال وخـل عنـك المعاذيـر

شفني شسوي وسو عقبي سواتي

إرفع يديك لمـن يـرد المقاديـر

وردد ورايـه ما تقولـه شفاتـي

كل عام وإنت بخير وأيامك بخيـر

وأنا معاك أعيـش باقـي حياتـي
،،،،