أبيها غزل مدري توجد على مافات

أسامر نجوم الليل واتالي الونات
سبب حاجةٍ عيني من النوم محرومه

وهوجس مع فكري واسوي معه حيلات
على شان يسعفني من الشعر منظومه

أبيها غزل مدري توجد على مافات
وأبيها قصيده تحكي الوضع وهمومه

وانا لي بها مقصد وانا لي بها غايات
عسى صاحِبي يفهم من القصد معلومه

خليلاً على خِلهُ تغيب عشر سنوات
ولا جتني أخباره ولا تجتني أعلومه

تغير حبيب الروح ماهو على العادات
وساير بكل الوقت لي يرمي أسهومه

وانا لو بغيت آحاسبه ماأكثر الغلطات
ولكن انا ماأحب أزعله وآلومه

وانا منتظر له وآتحراه بالسعات
وهمي على صدري والاسرار مكتومه

مابين الورق والحبر والقلب والآهات
رواية دفينه صحت الجفن من نومه

وعيني على فرقاه هلت من العبرات
غزير الدّمع والروح بالجوف مكلومه

حبيبي نظر عيني وياسيد السادات
بعد ذكرياتك داخل القلب مرسومه

وتبقى غلا روحي وحُبك سكن بالذات
وحُراسه أنفاسي والاضلاع بقدومه

على عهدنا وأكتب من المفردات ابيات
وصوّرت لك شوقي والاحساس ملغومه

ترفق بحالي لا تُخيّب لي الهقوات
ترى عاشقك ياقدر الحُب وأسلومه

وخل السوالف ياألغضي بيننا بسكات
وحبل الوصل لاتقطعه جوّد أعزومه

وانا قابل أعذارك وبتجاوز الهفوات
وكل البشر تُخطي وماهي بمعصومه

حسافه على حظٍ مصاحِبته العثرات
قتل خاطراً بالزين ماحقق أحلومه

وانا محسب إن الحظ في ساعة الشدات
يتعذر وعاملني تقول أكبر اخصومه

ومادام ياخلي على كيفنا ماجات
هذا رقم جوالي وأبي تحفظ أرقومه

وكلً يدوّر له طريقاً وله وجهات
والارزاق من ربي على الخلق مقسومه

كلمات/ أبوخالد