بياض اشتياقي

من ساحل الشرق, موج الشوق يجرفني
=طول المسافة يهون لخاطر عيونك

حظي وقف, يوم في مرساك وقفني
=وغيري ملايين يقصر حظهم دونك

جيت أعترف بالخطا, وأرجوك تنصفني
=ومن قبل تحكم علي, فكر على هونك

زماني, أجبرني أخطي وأنت تعرفني!
=قل لي, وش علاج وقتك لأخلف ظنونك؟!

زماني اللي بما لاطيق كلفني
=من حر رمضاه جيت" لفية جفونك"

مليت بعدك , و "نــاي" الضيق يعزفني
=خذني بقربك, وقسمني بــ "قــانونك"

أحس حزني, لأجل ترضى يكتفني
=تكفيك عامين حزن بعمر مسجونك؟!!

أطلق سراحي, ورتبني, وصنفني
=واغسل ذنوبي بعد ما تبت بـمزونك

حظي بعد غيبتك مايوم حالفني
=معقول, يكبر معاك ويرجع يخونك؟!!

حتى خفوقي, رحل يمك وخالفني
=أتلى العهد به, بعد ما شدت طعونك

جيتك, وجرح الغياب المر ينزفني
=ماظن, تبخل بترياقك, لمطعونك

جيت, وبياض اشتياقي لك يغلفني
=أبيك تعطي حياتي شي من " لونك"

مادام الآمال مالت يمك, أقطفني
=هرج العواذل "شتاه" أتعبني بدونك

ومادام وقتي بفن الحزن ثقفني
=أوعدك ماخلي أحزانك يدلونك

أخاف تبكي, من الضيقه, وتذرفني
=وأنا ملاذي الأخير" بفية جفونك

مما راق لي / تحياتي واشواقي