الغيرة

الغيرة… شعور طبيعي ولا مرض؟

الغيرة شعور كلنا نمر فيه، بس تختلف من شخص لثاني. مرات تكون دافع حلو يخليك تنافس وتطور نفسك، ومرات تتحول لشعور يخنقك ويخليك تضايق من غير سبب.

غيرة الحب:

هذي الغيرة اللي الكل يعرفها. تغار على حبيبك، على شريك حياتك، وتبدأ توسوس لو حسيت إنه معطي غيرك اهتمام أكثر. الغيرة بهالجانب طبيعية، بس إذا زادت صارت مشكلة، وتخلي العلاقة كلها توتر وشكوك. يعني خفّ شوي، لو الشخص يحبك ما راح تقدر أي غيرة تسرقه منك.

غيرة الأصحاب:

لما يكون عندك صديق قريب منك وتحس إنه صار يقرب من أحد ثاني. تبدأ تغار وتحس إنك فقدت مكانتك عنده. طبيعي، لأنك تعتبره جزء من حياتك، بس لا تخلي هالغيرة تفسد الصداقة. الصديق الحقيقي يبقى حتى لو كوّن علاقات ثانية.

غيرة الشغل أو النجاح:

أحد من زملائك اترقى أو نجح في شي وانت باقي بمكانك؟
شعور الغيرة هنا وارد،
بس الأهم كيف تتعامل معه. خليه دافع إنك تشتغل على نفسك بس لكل واحد منهم أسلوبه وطريقته في التعبير.

غيرة من الناس بشكل عام:

فيه نوع من الغيرة يجيك من غير سبب. تشوف أحد عنده شي تتمنى يكون عندك، سواء مال، منصب، أو حتى شكله. تذكر دايم إن لكل واحد حياته وظروفه، وما تدري وش اللي خلف الستار.


الغيرة المميتة
هي نوع من الغيرة اللي تتجاوز الحد الطبيعي وتصير خطيرة، لدرجة إنها تدمّر العلاقات، وتسبب مشاكل نفسية وجسدية للشخص نفسه أو للي حوله. هالغيرة تكون خليط من الحب، التملك، والخوف المبالغ فيه من الفقدان أو الخيانة

الغيرة المميتة ليست دليل حب،
بالعكس، هي شعور مؤذي أكثر للطرف اللي يغار.
الحب الحقيقي يبنى على الثقة والاحترام، وإذا فقدتهم، ما راح تقدر تحافظ على أي علاقة مهما حاولت


الخلاصة:
الغيرة شعور إنساني، بس الأهم إنك تتحكم فيه وما تخليه يسيطر عليك. إذا صارت الغيرة دافع للأفضل، فأنت كذا ماشي صح. لكن إذا خلتك تحقد أو تعيش بنكد، حاول تهدأ وتذكر إن كل شخص له رزقه ونصيبه.

ايلاف الورد ,هدوء المساء معجبون بهذا