قـــصــــة الــــتـــــرحـــال

على الله يازمن بشكي جروحي والليالي طوال
عسى راعي العنا ينسى عناه وينشرح صدره

على الله يازمن بشكي همومي والهموم جبال
تعدت عاصمة حزني حدود العالم بأسره

خساره يالسنين الي كتبتي سيرة الرحال
فرحت أمس وحزنت اليوم بس الخوف من بكره

لساني كم شكى صمته والى منه حكى ماقال
طغى طبع السكوت بسيرة المحروم من صغره

سقى الله يو كنت اضحك وبالي مستريح البال
ضحوك ماعرفت الحزن وش معناه وش قدره

وكبرت وكبرت أحلامي وصارت قصة الترحال
أماني في مهب الريح وحلم ماكتمل بدره

بعذر الي مع أيامه جلس يبكي على الاطلال
يذكر ماضي أفراحه الين خنقته العبره

عزيزه يالعيون الي حضنتي دمعة الرجال
حبستي دمعته بين المحاجر يوم ضاع أمره

عزيزه يالحروف اللي سكتي والكلام يقال
حكيتي..ماشكيتي الهم وهم القلب ياكبره

عزيزه ياليدين اللي ثنيتك باصعب الاحوال
كفك ساعة الحاجه وامدك ساعة القدره

وعزيز النفس لو يصبر على صبر الليلي نال
تصبر والرجل يصبر ومقياس الرجل صبره

أنا منهو حمل همه على راسه تقوال عقال
مجاديف الزمن دارت عليه ونسف الغتره

وأنا منهو فقد صوته وبعض الصوت به مازال
دعيت الله يفرجها علي وبحت النبره