طاح الحطب وحلوة الحياة

بسمــــــــــــــــــــــــه نبدأ ونستعين




المشهد الاول:

وحدة مزيونة بالحيل , و حبيبة
بس تخون !!!!
وش تسوي بجمالها ؟؟
بياخذها الزمان و تبقى عجوز
عادي // طاح الحطب , و حلوة الحياة



المشهد الثاني:

سيارة مسرعة
و تدعس لها واحد
مسكين هندي
و العسكري صديق الطايش
والخطأ نصه على الهندي
والباقي على أبو الطايش
و في الليل الطايش يلعب بلوت
عادي // طاح الحطب , و حلوة الحياة



المشهد الثالث:

غني و ظالم
يطرد المساكين و يستغل الضعوف
مغرور و فاسق
و مجلسه عامر
كلن يبهر له
و مع ذلك يجمع حسنات من كثر اللي يسبونه
عادي // طاح الحطب , و حلوة الحياة


المشهد الرابع:

يكد يدرس و يشتغل
لأجل يبني مستقبله
تزوج و جاب عيال ثم تقاعد
صار يسكن في مكان و أم عياله في مكان
والسبب العيال
صار دار المسنين بيتهم
عادي // طاح الحطب , و حلوة الحياة




المشهد الخامس

تغازل و تاخذ أرقام
و تطلع مع هذا و تواعد هذاك
و يوم طاح الفاس في الراس
بكت
و راحت تشكي لأمها غدر الزمان
طبطبت عليها أمها وقالت:
ولا يهمك سفرة لمصر وشوية سيولة
و ترجعين بنت
عادي // طاح الحطب , و حلوة الحياة



المشهد السادس:

مرفوع الكفن أبيض
وصاحبه وسط البياض
بعضهم يبكي و بعضهم عادي
دفنوه و تبكبكوا شوي
و آخر الليل سكارى
عادي // طاح الحطب , و حلوة الحياة




المشهد السابع:

ملتزم
يصلي كل الفروض
و إذا تعب فوت صلاة الفجر
واذا شبع راحت صلاة العصر
و عنده دش و يكذب كثير
و اذا صحى الصبح مشط اللحية
عادي // طاح الحطب , و حلوة الحياة




المشهد الثامن:

قارورة مويه
ما تضره طايحة في السيارة
يناظرها بغضب زعلان منها
و يفتح الشباك و رماها وسط الطريق
و اذا اجتمع مع الشباب قال:
متى بنتحضر ؟؟؟
عادي// طاح الحطب , و حلوة الحياة




المشهد التاسع:

أهم شي الثوب نظيف و الشماغ مكوي
و القلم ماركة والساعة تضوي
و الجزمة جلد والسيارة عجب
و تلفونه ما يسكت
إما بنات
أو البنوك تبي فلوسها
عادي // طاح الحطب , و حلوة الحياة




المشهد العاشر:

سطحية و مغرورة
غبية و متكبرة و ياريتها حلوة
تبي زوج مواصفات
ما يقول لا ويكره الاستراحات
لازم وسيم و أنيق و متعلم و دخله ممتاز
و يحب السفر
و بعد سنين تلاقي نفسها في الأنترنت
تدور واحد يقبل بها
عادي // طاح الحطب , و حلوة الحياة




المشهد الحادي عشر:

فتح الكمبيوتر
و دخل المنتدى و كلامه ما يتعدى أن الموضوع روعة و رهيب
و هو ما قرأه و لا يعرف كاتبه
بس يبي يزيد المواضيع موضوع
ويزيد همومنا هم
علشان يصير صاحب الألف موضوع
و يتميز
والمشكلة أنه يتميز
عادي // طاح الحطب , و حلوة الحياة




المشهد الأخير:
الكذب أثم ومع ذلك نستخدمه
و ندري أن هذا حرام و مع ذلك نجربه
نتذكر السهرة و الفرح و السفر
و ننسى الجالسين على كتوفنا
و نتناسى أن معهم كتاب يسجل أفعالنا و نياتنا
كل شي محسوب
حتى النظر
نسينا أن ورانا يوم علاماته قربت
ومع ذلك كلنا ناسين
أن بقيت على حالك تتناسى لازم تعرف إن:
ذاك اليوم مهوب عادي
وأنت الحطب
و ما به حياة


مودتي للجميع