محتاجة ارآءكم؟

اسعد الله صباحكم اينما كنتم

السالفة ومافيها
عندي عاملة منزلية باقي لها شهر وتخلص
3 سنوات وتبغى تواصل سنتين كمان )

طيبة وطوعية جدا وشغلها تمام ..
ولكن الزين مايكمل حلاه ..


مو هذي السالفة !
بل اكبر ..
لاحظت عليها وزنها في نزوول مستمر
مع العلم لمن جات كانت دب ..

مالكم بالطويلة ي اعزاء
وديتها المستشفى وطلع عندها السكر التراكمي 14 !!!

استغربت لانها نشيطة جددا وتشتغل على اكمل وجه ..

وصفت لها الدكتورة ابر يومية وبرنامج غذائي
مكثف لمدة شهر عبال ماينزل السكر للمعدل الطبيعي ..-

نفسيتي جدا جدا تعبانة
الكل يقول سفريها لا يصير لها شي وتموت
عندك ،، غير توصية الدكتوره انو لازم انتبه لها
لانو احتمال يصير لها هبوط حاد من ابر الانسولين ..!)
10 مل يوميآ وفي المساء ..

السؤال الي يطرح نفسه
هل اسفرها وتروح تتعالج في بلدها
وعند اهلها وزوجها وعيالها ، افضل
او اتركها ويدي ع قلبي وكل شوي اجلس اتابع حالتها ،،

انا في حيرة وخالقي
والجمهور عندي منقسمين بين
مؤيد ومعارض لسفرها ..

افيدوني اسعدكم الله
ورسوني على بر
وخلصوني من القلق والحيرة الي انا فيها ..

انا نفسي معد لي رغبة فيها و ودي احجز لها
واسفرها اليوم قبل بكره
بس هي محتجة عالسفر وتجلس تبكي
وتسويلي مواويل على ظروفها الصعبة ..



بنتظار اراءكم ..؟

السفيره ,أحمد الفارس ,ميساء الحياه ,هدوء المساء ,إستفزاز معجبون بهذا

وعليكم السلام ورحمة الله وبركاته

أهنن وسهنن بالحره


اول شيء دام الخادمة باقي لها فتره بسيطه ولها الرغبه

في التجديد والله هذا دلالة ع حسن ولطافتك معها

هذا اللي مرغبها فيك

ومسألة عندها سكر تراكمي مرتفع

والله عادي جدا وخليها تستخدم الأنسولين

في البدايات مع المنظم

والحين أطفال يولدون سكريين


من حلاوة هذا المرض اسمه يهبل [سكر]

خليها تنتظم بالجرعات

ومع حركة الشغل خلال اسبوعين

تلاقين التراكمي 9

الخوف إذا عندها صرع ولا مرض ثاني اخطر منه


نصيحتي تبقى وتكسبي بها الاجر


عند التجديد اخبري المكتب بصورة

من التقرير ك روتين


ما عليك خلاف ندى


تقبلي مروري

ندى ,أحمد الفارس ,ميساء الحياه ,هدوء المساء معجبون بهذا

أنا من رأي كلام الأخ إستفزاز..
ودائماً مريض السكر عافنا الله وإياكم
في البداية يكون لخبطة في خفض نسبة السكر
التراكمي وتحديد الجرعة المناسبة ونوعها..
وبمجرد نزول معدل السكر التراكمي
وضبط الجرعة المناسبة مع الإلتزام بالحمية
تصبح الأمور طبيعية جداً..
وإحتسبي الأجر من الله..
وفقك الله لما فيه الخير

إستفزاز ,ندى ,ميساء الحياه معجبون بهذا

نداي حبيبتي

اسمعي مني و خلي الرجال عنك 😝


إذا كنت انا في مكانك، ما تردد في تسفيرها و ترجع لـ أهلها وتتلقى العلاج اللازم بينهم
. صحتها وسلامتها تأتي أولًا.

أنتِ مو محتاجة إلى ضغط نفسي إضافي،
خاصة وأنه لازم تراقبي حالتها وجرعاتها يوميًا.

الوقاية دائمًا أفضل من العلاج،
وهذا ليس من باب الأنانية،
من باب الحرص على راحتك وراحتها.

نحن البنات،
نتحمل ضغوطًا كبيره،
لكن بعض الأحيان أبسط الأمور أثقلها علينا.

عندنا تجربة مماثلة؛
كانت عندنا عاملة في نهاية عقدها،
أصيبت بالدوالي والتهابات في الساق
، ما أثر على نفسيتها بشكل كبير
. بدأت تشعر بالكراهية تجاه الجميع
ما تثق في الأدوية حتى التي يوصفها الطبيب.

للأسف، كنا نقدر نسفرها بسبب ظروف جائحة كورونا في ذلك الوقت.
و لما فتحوا الطيران و التأشيرات سافرت على طول

المرض يأثر واجد على النفسية.
إذا كنتِ تشوفي أنها متعايشة مع وضعها الحالي وتستطيع الاستمرار
، الله يخفف عليها ويساعدها خليها

أما إذا تلاحظي عليها التعب والقلق الدائم،
فأفضل قرار هو تسفيرها،

حفاظًا على سلامتها وسلامتك.

فديتك

إستفزاز ,ندى ,هدوء المساء معجبون بهذا

هلا ندى
ندى السكري عندها ضارب 14
مفروض مايتجاوز ال 5فاصله 7
وان تجاوز بشي بسيط
هذه الله يعينها


أنا اقلك ايش تسوين ؟
من غير تفكير ومن غير حيره
خليها تتوكل ع الله وترجع بلدها بين اهلها
وعيالها وناسها وربعها ،
الغريب يظل غريب ،،
وانت جايبتها للخدمه


اول السكري بدايته متعبه جدا
والسكر من شخص لشخص يختلف
البعض عندهم بدايته يكون خفيف
والبعض شديد

البعض مجرد مايستقر عنده ويعرف
يتعامل معه يستقر
والبعض حتى لو تعامل معه مجرد لخبطه
ارهاق مايستقر ويتعب ويتعب اللي معه
ونظام غذائى ورعايه وراحه وعدم اجهاد

وشوفي متى يترتب عندها ؟؟؟؟
ياخذ وقت اقصى حد 3شهور



لذلك تسافر واهلها يديرون بالهم عليها

انت جايبتها للعمل وشغل البيت
الان انقلب الوضع راح انت اللي تمسكي
كل شي وراح يكون بالك مشغول عليها
وقلق وتعيشي في حاله قلق دايم
وعدم استقرار


عندنا اعمال وإشغال تكفينا ومالله
بها عليم
،،،
كمان جايه تتحملي تعب الشغاله
اللي انت جايبتها أصلا لخدمك وعشان
تريحك >> يامن شرا له من حلاله عله
الله يرفع عنها
،،

من خلال تجربه
زوجي عنده سكري
واختي كذاك
ماقلك كمية ال معاناه معاهم

لازم عينك عليهم أكلهم علاجهم متابعتهم
رعايه اهتمام عدم مجهود ،،
حتى أكلهم تراقبيهم لايزيدون الكميه
ان طلع خطير ان نزل اخطر



اختي عايشين في قلق عليها
ينزل فجاه يصعد فجاه
ولها فوق العشر سنوات لديها
ومازلنا في قلق دايم
،،،


ع سبيل المثال /
لو عندك احد من البيت عنده سكري
لاسمح الله
مين راح ياخذ باله منه
انت ولا زوجك ؟

المراه هي اللي تقوم بكل شي
من الرعايه والاهتمام والحرص
وتنظيم الاكل والملاحظة وتتبع العلاج

اما الرجل ف يعطي أوامر بالسان فقط
لذلك الحمل الكبير يقع ع عاتق المراه

< فراي الرجل راح يكون محايد عننا
لأنهم بس الأمرين ،،
<< سلام وتعظيم مننا لجنس ادام هههههع
لاتزعلون 🫡

فأنت في غنى عن هذا العبء لان
انت جايبتها لغرض الخدمه لكم

لو حصل لها شي او مضاعفات
راح انت آللي تلومين نفسك

،،
رايي من راي ميساء كون لدينا تجارب

،،

الله يشفيها ويعافيها
وعندها اهل يديرون بالهم عليها

وانت دام قطعتي خدمتها ابري
ذمتكً فيها واعطيها اللي الله كاتبه لها

وخلي بينك وبينها تواصل

ووصيها انها تشوف لك عامله ع معرفتها
بشروطك انت ،والله يسهل امرها

والله يكون بعونك وتلاقين غيرها
هذه القضيه تحصل منها كثير
لكن كويس جات ع سكري

،،

يعطيك العافيه ندى
وتسلمين لبث مشكلتك هنا
وان شاء الله الاراء تشيل من حيرتك
وقلقك،

موفقه ندى
ودمتي لنا القلب النابض
ختم واضافه
،،،

ندى ,هدوء المساء ,ميساء الحياه معجبون بهذا

الفاضلين
استفزاز
وهدوء المساء

الف شكر لمداخلتكم وانسانيتكم
واخلاقكم العالية تجاه هذه العاملة ..)

ورايكم على عيني وراسي ..)

لكن والله ماعاد لي قدرة على متابعتها
جربت ولكن فشلت !،
وانا مش موجوده في البيت على طول

عندي دوام متقطع يوم ويوم …-
بعدين صارت منفسة مررة وبس تتهاوش
حتى مع الهواء اذا مر عليها ..!
والشيء الاهم :
مو راضية ابدا تقبل الحمية
وبس تلخبط في الاكل تموت في السكر
ولمن منعتها صارت تخبيه تحت مرتبتها
تقول ماتقدر تشرب شاهي من غير سكر
وتحط ربع الكوب ياليت ملعقة ولا ثنتين ..-

ولما اجيب لها سيرة السفر تجلس تبكي
وتتمسكن وتمسح فيني بيدها
وتنزل عند ارجولي تترجاني مااسفرها ../

الظاهر اخرتها انا الي بيجيني سكر ! )

قلبي يعورني عليها اذا سوت كذا وفي نفس الوقت
مااقدر اشيل مسؤليتها ولا اتحمل غثاثتها وصياحها

لازلت متردده ومحتاره وحالتي حاله ..
اليوم طلعتها المول تشتري كل الي نفسها فيه
وبدال ماتفرح وتنبسط جلست تبكي
تقول عارفه حتسفريني !)😭

صراحة طابت النفس منها ..-

اللهم دبرني فإني لا احسن التدبير ..

يقول الله عز وجل في محكم التنزيل
لايكلف الله نفسا إلاّ وسعها..

والمرض بقدر الله وقضاءه وليس بتدبيرك او ارادتك..
وأنتِ بذلت كل مافي وسعك لمساعدتها والبحث لكل ماهو مفيد لها.

عالجتيها واشتريتِ لها الدواء ونصحتيها وبذلت اقصى ماعندك من وسائل التعليم والإرشاد..

ونصيحتي لك تسفيرها إلى اهلها فهم اولى بها وهم من يقومون برعايتها والإهتمام بها وهم مكلّفون بها ..
وإذا كان لديك خير فساعديها ولو بملغ مالي كل شهر في حسابها عند اهلها..

وبيتك وزوجك وأبناءك هم اولى الناس بالإهتمام الرعايه..
ولن يسألك الله عن هذه الخادمه إلاّ إذا كان هناك ظلم لها..

ولكن سيسألك عن اهل بيتك لماذا قصّرتي معهم..

ضميرك الواعي جرس انذار في داخلك وهذا دليل على تربيتك الأكثر من رائعه
وقليل امثالك في هذا العالم فحفظك الرحمن وبارك فيك...

ندى معجب بهذا

الغاليات وسكر المنتدى
ميس القلب وسفيرة الروح

الله لا يحرمني منكم ومن شوركم ورأيكم
ولا يحطكم في موقف مثل هذا ..

صعب جدا انو العاملة تحب اهل البيت
وترتاح لهم وتعودت عليهم وبعد 3 سنوات
تطلع مريضة وفوقها تعتبر نفسها مطرودة ..)

لكن في النهاية مايصح الا الصحيح
ومثل ماقلتم اخواتي العزيزات
حبآ فيها وسعيآ ورى مصلحتها الصحية
الافضل تروح تتعالج عند اهلها …..

ان شاء الله تقتنع بس وماتروح وخاطرها مكسور ..

الف شكر للمداخلة القيمة ..🌹🌹

اخي الفاضل النادر / اسعدك الله
مثل مااسعدتني واثلجت صدري بردك ..)

صدقت بكل كلمة فمنطق الامور بالفعل يقول
اهلها اولى بالاهتمام فيها ومتابعة علاجها ….

ومثل ماقلت الله يجزاك خير نقدر نتواصل معها
ونلبي كل احتياجاتها وهي في بلدها ..)

شكرا لمداخلتك القيمة ويعطيك العافية يارب .

باختصار بما انك قلتيها في البدايه
انك معاد تبغيها
وخايفه من إلا راح يسير
من أمور الواحد في غنى عنها
فا مثل مقال النادر
أهلها اولى فيها
أعطيها المقسوم والله يستر عليها
ويشافيها ويشافي كل مريض
ويعوضك بالأفضل

المشاركة الأصلية كتبت بواسطة ام هتان

باختصار بما انك قلتيها في البدايه
انك معاد تبغيها
وخايفه من إلا راح يسير
من أمور الواحد في غنى عنها
فا مثل مقال النادر
أهلها اولى فيها
أعطيها المقسوم والله يستر عليها
ويشافيها ويشافي كل مريض
ويعوضك بالأفضل

اي والله معد ابغاها والنفس طابت ام هتان ..
كلفتنا راتب 3 شهور شحن لاغراضها الي تجمعها
من سنين 🥴

صعقت وربي لما قالولي عن قيمة الشحن لبلدها ../-
خلاص ودينا اغراضها وباقي اكمل اوراق سفرها وفي امان الله ..-
قالت ابي ذهب مدام ) قلت هات فلوس هههههههههههه
قالت لا هديه منك انا مسكين 🥴

واروح اشتريلها اكسسوارات وخرابيط كانها ذهب عيار 21
المهم انها اقتنعت وتروح ونفسها صافية وراضية عني ..)

ليسى ياجماعة طلباتها مالها حدود لاني اعطيتها وجه زياده..
تبغى اجهزة كهربائية من الاوزان الثقيلة 😤

يامن جاب له من من فلوسه عله ..-/


الحين جبت وحده من راحة بعقد سنة ،،./-
ياااا مااا اغلاها ،/- 😹

ولما شافتها هجت وثارت فيني ،، عبالها بترجع بعد شهرين ،،/
ماتدري انو خروج نهائي ،،.-🤗


الله يغفر لي ويسامحني ، عشان تسكت من الحنٓة على راسي
قلت ترجعين بعد ماتتعافين من المرض. وتصيري دبا مثل اول


يلا فتكم بعافية ..

هدوء المساء معجب بهذا

الله يكتب أجرك.. ويختار لك الخيرة الطيبة..
ويعطيك خير الجديدة ويكفيك شرها..

ندى معجب بهذا

اللهم امين .-

تسلم اخوي هدوء المساء ..