قصيدة الجمهره للشاعر حامد بن زيد

(((الصاحب اللي ماكسبت محبته ما تخسره)))


قصيدة الجمهره للشاعر الكبير حامد بن زيد


إي بالله أخطو والخطا اللي جابهم عين الصواب

مبطي وانا اشوف الطمع يكشف زادهم وأستره

مايملي عيون الحسود بهالزمن غير التراب

ومن لايتوب من الخطا تحرم عليه المعذرة

اللي من أولها خراب أكيد تاليها خراب

والبندق اللي ماتثور في هدفها تذعره

ودك ليا من جاتك الغلطة من الناس القراب

الصاحب اللي ماكسبت محبته ماتخسره

مشكلتي إني ماعرفت أحسب لصدتهم حساب

قلطتهم صدري على ذكرى قصيد وحنجرة

صوتٍ يصول بمنبره وخطاب مامثله خطاب

والطيبة اللي زعزعت صوت الخطيب ومنبره

مافي دمعٍ صوبوه أحبابي بوجهي وخاب

ولا زرق حزني على غالي ولا فج أنحره

كل الزهاب اللي معي ذكرى من أصحاب الزهاب

واللي بقا لي من عذاب أشرس طريقي وأخطره

لأني تجنبت الغرق, عديت من فوق السحاب

لأن أكثر أصحابي ورق ماشفت للطيب ثمره

والله ماحطيت بين الحقد والخوة حجاب

حتى غدو ربعي يحدوني على الضيق أشكره

البارحة ثارت علي أرقاب و آوتني أرقاب

البارحة ياثقل دم البارح ويامحقره

أثر المصايب ماتجيك إلا من الناس القراب

وبهالزمن حتى الخوي اللي تثق فيه إحذره

أهٌب ياوجه الحسد وشلون جمعهم وغاب

كيف السنين اللي عطتني بعثرتهم بعثره

لابارك الله في رقيقٍ تزعله كلمة عتاب

ولاجمع الله الرجال اللي تفرقهم مره

الصاحب اللي مايجي من صحبته غير العذاب

نذرٍ علي إن ماهجرني ولا أنا اللي بهجره

من يفتح لفرقاي باب أفك له عشرين باب

وإذا خويي مايقدر خوتي ما أقٌدره

عودت نفسي كل ماشددت في يمة ركاب

ماصدد وجهي عن طموح إلا لياجبت اخبره

إن روٌحو فأنا بريء منهم الى يوم الحساب

وإن جرٌحو قولو لهم ماحركو فيٌ اشعره

شفهم لهم حول السنة ولا خذو مني جواب

أحسن دوا للي يحاول يستفزك (تــــحـــــــــــقـــــــــــــره)

ماكنت أحاتيهم صغير, عاد أحاتيهم شباب

الصاحب اللي مأذخرني لليوم الأسود ما أذخره

شفني جمٌعت أوراقهم بكتاب وأغلقت الكتاب

ياوقت لم اللي تلمه وأنثر اللي تنثره

اللي يخاف من الظما يترك لنا طرد السراب

واللي ماهو بقد الظلام و وحشته لايسهره

عقب إكتئاب البارحة ماعاد أنا حمل إكتئاب

الطيب جرجرني وأنا ماني بناقص جرجره

أنا تجرعت العطش لين إحترق وجهي وذاب

أنا كسرت بخاطري قبل الصداقة تكسره

أنا خسرت اللي غيابه غير عن كل الغياب

أنا غفرت لعالم ماتستحق المغفرة

أنا أكثر إنسان تعلم من كثر ما أخطا وصاب

أنا آخر لسان يتكلم في زمان الثرثرة

أنا القصيد اللي فزع من دفتره مليون ناب

وأنا الوحيد اللي جمع مليون ناب بدفتره

جفني وجرٌحه السهر حيلي وهدته الصعاب

دمعي هدر, ضحكي ندر, عمري وضيعت أكثره

شيٌبت بعقول العرب, هيبت روسٍ ماتهاب

جمهرت ناسٍ عمرهم مايعرفون الجمهرة

ماصرت ذيب إلا لأن اللي حواليني ذياب

ماكنت أغيب إلا لأن العفو عند المقدرة

ترا حلاتك لاحملت لصاحبك كلمة عتاب

إن مانطقت بها بوجهه, ماتذمه بظهره

بهالزمن مايملي عيون الحسود إلا التراب

ولا الحظيظ الطلقة اللي ما تصيبه تذعره

ودك اليامن جاتك الغلطة من الناس القراب

الصاحب اللي ماكسبت محبته ماتخسره

قصيدة رائعة وجزلة
صح لسان الشاعر
سلمت يمين الناقل
شكرا لك ايها المبدع

قصيدة جميلة جدا شكرا لك من اعماق القلب على هالابداع دمت ودام لنا قلمك المبدع دمت بوووووود وسعادة الهووووووووووووووووى

أخي أبو فواز


أخي الهوى


وفقكم الله وجزاكم الله خيرا .... أخوكم (أبو مسلم )